Шупашкар районӗнче, «Шупашкар-Сурски» ҫул ҫинче, виҫӗ автомашина ҫапӑннӑ. Инкекре икӗ ача суранланнӑ, тепӗр иккӗшне сывлӑхне тӗрӗслеме пулницӑна илсе кайнӑ.
«Опель» автомобиль водителӗ хирӗҫ килекен ҫул ҫине тухса кайнӑ та КамАЗпа ҫапӑннӑ. Унтан ҫӑмӑл машина «Форд» ҫине пырса кӗнӗ.
«Опель» машинӑра ларса пынӑ 13-ри хӗрачапа 8-ти арҫын ачана пульницӑна илсе кайнӑ. «Фордри» 3-ри тата ҫулталӑкри ачана та сывлӑх сиплев учрежденине ӑсатнӑ.
Водительсем пурте урах пулнӑ.
Чӑваш Енре «Управленческая команда» (чӑв. Ертсе пыракансен команди) конкурса пӗтӗмлетнӗ.
2025 ҫулти ҫӗнтерӳҫӗсен шутӗнче 5 ҫын:
- Ирина Коптева, Шупашкар районӗнчи Толиккассинчи вӑтам шкулӑн директорӗн воспитани енӗпе ӗҫлекен ҫумӗ;
- Александр Иванов, «ИТ-Консалтинг» тулли мар яваплӑ обществӑн администраци директорӗ;
- Александр Смирнов, «Форт Диалог» проектсен ертӳҫи;
- Денис Андреев, «Время СВОих» программӑна хутшӑннӑ ҫын, Ҫӗмӗрле районӗнчи дежурствӑпа диспетчер службин директорӗ ;
- Ренат Чебутаев, Шупашкарти 38-мӗш вӑтам шкул директорӗ.
Шупашкар округӗнчи хӗрарӑм ултавҫӑсен аллине лексе самай пысӑк укҫа ҫухатнӑ. Вӑл палламан ҫынна 8,5 миллион тенкӗ куҫарса панӑ.
Ун патне темиҫе палламан ҫын шӑнкӑравланӑ: пӗри хӑйӗнпе «Госуслуги» порталӗн ӗҫченӗ тесе паллаштарнӑ, теприсем — «хуралӗн» тата «ФСБ» ӗҫченӗсем имӗш. Хайхискерсем 64-ри хӗрарӑма тупӑшне деклараци тумаллине пӗлтернӗ. Ҫакна тумасан унӑн укҫине вӑрлама пултараҫҫӗ-мӗн.
Хӗрарӑм ҫав ҫынсене ӗненсе пӗтӗм укҫине ултавҫӑсем янӑ курьер урлӑ парса янӑ. Пӗтӗмпе — 8,5 миллион тенкӗ. Укҫана каялла тавӑрса памасан тин вӑл ултавҫӑсен серепине ҫакланнине ӑнланнӑ.
Шупашкар округӗнче паян велосипедпа пынӑ 67 ҫулти хӗрарӑма машина ҫапса кайнӑ.
Малтанлӑха пӗлтернӗ тӑрӑх, Патшалӑх автоинспекцийӗ малтанлӑха пӗлтернӗ тӑрӑх, «Лада Гранта» машинӑпа пынӑ 58 ҫулти водитель ҫул хӗррипе кайнӑ чухне велосипедистка ҫине пырса кӗнӗ. Хӗрарӑм аманнӑ, ӑна Шупашкарти васкавлӑ медпулӑшу больницине илсе ҫитернӗ.
Водитель акӑ епле ӑнлантарса панӑ: хӗрарӑм кӗтмен ҫӗртен машина еннелле пӑрӑннӑ. Ун ҫине пырса тӑрӑнас мар тесе водителӗн хирӗҫ ҫул ҫине тухма тивнӗ. Анчах пур-пӗрех водитель велосипеда кӑштах пырса ҫапнӑ. Хӗрарӑм асфальт ҫине ӳкнӗ.
Калмӑк Республикинче пурӑнакан пирӗн ентеш Петр Леонтьев 100 ҫулхи юбилейне паллӑ тунӑ. Кун пирки Чӑваш Енӗн патшалӑх телерадиокомпанийӗн сюжетӗнче пӗлтернӗ.
Вӑрҫӑ ветеранӗ Ҫӗрпӳ районӗнчи (халӗ — Шупашкар районӗнчи) Шорти Марка ялӗнче ҫуралса ӳснӗ.
1943-мӗш ҫулта вӑл салтак атти тӑхӑннӑ. Аслӑ Ҫӗнтерӗве Берлинта кӗтсе илнӗ.
Петр Леонтьев Сталинград ГЭСне тунӑ ҫӗрте те тӑрӑшнӑ, Элистари нимӗҫсем аркатнӑ университет ҫуртне юсама та хутшӑннӑ. Унтах ҫемье ҫавӑрса пӗр ывӑл ура ҫине тӑратнӑ.
Паян Ҫӗрпӳ муниципалитет округӗн пуҫлӑхне Алексей Иванова тытса чарнӑ. Ӑна УК-н 285-мӗш статйин 2-мӗш пайӗпе (должноҫпе усӑ курнӑшӑн) тата 289-мӗш статйипе (усламҫӑ ӗҫӗпе саккунсӑр майпа хӑтланнӑшӑн) килӗшӳллӗн айӑпласшӑн. Куншӑн тӗрмене 7 ҫул таран хупма пултараҫҫӗ.
Палӑртмалла: 35-ри Алексей Иванов Ҫӗрпӳ округне 2022 ҫулхи раштавран ертсе пырать. Унччен Шупашкар районӗнчи Лапсар ял тӑрӑхӗн пуҫлӑхӗ тата Шупашкар район администрацийӗн пуҫлӑхӗн ҫумӗ пулнӑ.
Шупашкар округӗнче вырнаҫнӑ «Мега Юрма» кайӑк-кӗшӗк фабрикинче пулнӑ пушарта 400 ытла чӑх чӗппи ҫунса кӗлленнӗ.
Пушар ӗнер каҫхине Хурӑнлӑх ялӗнче пулнӑ. Унта фабрикӑн корпусӗ вырнаҫнӑ. Предприятире ӗҫлекенсем пушара ҫӑлавҫӑсем ҫитичченех сӳнтернӗ.
Ҫакӑ паллӑ: ҫулӑм 17 тӑваткал метр лаптӑк ҫинче алхаснӑ.
Шупашкар округӗнчи Ҫӗнӗ Тутаркасси ялӗнче вырнаҫнӑ «ЧебоМилк» предприятири зоотехника ӗне амантнӑ.
Ку авӑн уйӑхӗн 30-мӗшӗнче ирхи 8 сехетре пулнӑ. Предприятире ирхине ӗнесене пусма ямашкӑн уйӑрнӑ вӑхӑтра пӗри тӑрук зоотехник ҫинелле вирхӗнсе пынӑ та пуҫӗпе сӗкнӗ. Зоотехник вӑйлах аманнӑ.
Халӗ Патшалӑх ӗҫ инспекцийӗ ку ӗҫ тӗлӗшпе тӗрӗслев ирттерет.
Шупашкар районӗнчи Ҫӗнӗ Тренкассинчи РФ Геройӗ Д.Семенов ячӗллӗ вӑтам шкулта агротехнологи класӗ уҫӑлнӑ.
Шупашкар районӗн хаҫачӗ «Тӑван Ен» халӑх тетелӗнче пӗлтернӗ тӑрӑх, аграри класӗ чечек ӗрчетес енӗпе ӗҫлеме пуҫлӗ. Аграри класне Чӑваш патшалӑх аграри университечӗ пулӑшнипе уҫнӑ.
Ку класра шкул ачисем ӳсен-тӑран тата чечек ӳстерес ӗҫре ҫӗнӗ йышши меслетсене тӗпчеме пуҫлӗҫ, ҫавӑн пекех ҫӗнӗ йышши технологисемпе усӑ курса тӗрлӗ сӑнав туса ирттерӗҫ.
Агрокласа шкул ачисене ял хуҫалӑх производствин, биотехнологин никӗсне вӗрентес, ӑнлантарас тӗллевпе уҫнӑ.
Паян, авӑн уйӑхӗн 15-мӗшӗнче, Никита Енчиков ҫуралнӑранпа 115 ҫул ҫитнӗ.
Никита Петрович Шупашкар районӗнчи Мӑнал ялӗнче ҫуралнӑ. Вӑл мечӗкпе хоккейла выляссипе Чӑваш Ен чемпионӗ пулнӑ. Унсӑр пуҫне «Спартак» Шупашкар командинче футбол выляса Чӑваш Ен чемпионачӗн призерӗ ята тивӗҫӗ.
Арҫын Шупашкар хула канашӗн ӗҫтӑвкомӗн председателӗ, коммунистсен партийӗн Шупашкар хула комитечӗн пӗрремӗш секретарӗ пулнӑ, чылай ҫул Чӑваш АССРӗн коммуналлӑ хуҫалӑх министрӗнче тӑрӑшнӑ.
-13.7 °C